काँग्रेस अध्यक्ष राहुल गांधी यांनी आम्हाला एक मोठं उद्दिष्ट दिलं आहे. २०१९ चं युद्ध आम्ही पूर्ण ताकदीनिशी लढणार, असा निर्धार प्रियांका गांधी वड्रा यांनी बोलून दाखवला. काँग्रेसने राष्ट्रीय महान लोकशाही पार्टीसोबत आघाडी केली. त्यावेळी त्या बोलत होत्या.राष्ट्रीय महान लोकशाही पार्टीचे अध्यक्ष केशव मौर्य यांचं प्रियांका यांनी स्वागत केले. पश्चिम उत्तर प्रदेशचे प्रभारी ज्योतिरादित्य शिंदे यावेळी घोषणा केली की, 'काँग्रेस उत्तर प्रदेशात महान पक्षासोबत निवडणूक लढवणार.' उत्तर प्रदेशात अराजकता वाढली आहे. जातीनिहाय आरक्षणाच्या नावाखाली सर्वच पक्ष राजकारण करत आहेत, असं केशव मौर्य म्हणाले.दोनच दिवसांपूर्वी लखनऊमध्ये रोड शोद्वारे प्रियांका यांचं भव्य स्वागत करण्यात आलं. त्यानंतर प्रियांका अॅक्टिव मूडमध्ये दिसल्या. त्या मॅरेथॉन बैठका घेत आहेत. पहिली बैठक पहाटे साडेपाच वाजता संपवून त्यांनी दुसऱ्या दिवशीची बैठक सुरू केली. प्रत्येक जिल्ह्याच्या कार्यकर्त्यांना त्या भेटत आहेत. या दरम्यान प्रियांका यांना भेटण्यासाठी येत असलेल्या कार्यकर्त्यांकडून एक अर्ज भरून घेतला जात आहे. हा अर्ज सोशल मीडियावरही वायरल झाला आहे. कार्यकर्त्यांचे व्हॉट्स अॅप नंबर, पोटजात आणि टि्वटर हँडलची माहिती मागवण्यात येत आहे.
